संविधान दिवसमा बेसीशहरमा प्रभातफेरी

मर्स्याङदी समाचार, ३ असोज ।
संविधान दिवस तथा राष्ट्रिय दिवसका अवसरमा शनिबार विहान लमजुङ सदरमुकाम बेसीशहरमा प्रभातफेरी निकालिएको छ ।

संविधान दिवस तथा राष्ट्रिय दिवस जिल्लास्तरिय समितिको आयोजनामा भएको प्रभातफेरीमा विभिन्न कार्यालयका कर्मचारीहरु सुरक्षाकर्मीहरु, जनप्रतिनिधि र संचारकर्मीको सहभागिता रहेको थियो । बेसीशहर ७ मनाङ्गेचौताराबाट सुरु भएको प्रभातफेरी मुख्य बजार हुँदै जिल्ला समन्वय समितिको सभाहलमा आएर सभामा परिणत भएको थियो ।

सभामा सम्बोधन गर्दै जिल्ला समन्वय समिति लमजुङका प्रमुख पूर्णवहादुर गुरुङ र प्रमुख जिल्ला अधिकारी कृष्ण प्रसाद खनालले सबै जातजाति भाषाभाषीको अधिकार सुनिश्चित हुने गरी बनाइएको संविधान सबैको साझा दस्ताबेज भएको बताउनुभयो । जनताको सङ्घर्ष र शहीदको बलिदानबाट प्राप्त संविधानले नै नेपाललाई थप बलियो, समृद्ध र मर्यादित बनाउने काम गरेको धारणा राख्नुभयो । कार्यक्रमको सहजिकरण जिल्ला समन्वय अधिकारी महेश सुवेदीले गर्नुभएको थियो ।