मर्स्याङदी समाचार, १३ असोज
बेसीशहर नगरपालिका–७ सातबिसेस्थित भूपू सैनिक आवासीय माध्यमिक विद्यालयले अभिभावक बैठक आयोजना गरी बालबालिकाको शिक्षामा अभिभावकको भूमिका तथा घरको वातावरणका विषयमा छलफल तथा अन्तरक्रिया गरेको छ ।

मंगलबार विद्यालयमा आयोजित कार्यक्रममा कक्षा ४ र ५ का करिब ७० जना अभिभावकको सहभागिता रहेको थियो । कार्यक्रममा विद्यालयका प्रिन्सिपल विनोद गुरुङले बालबालिकाको शैक्षिक उपलब्धिमा विद्यालयको शिक्षणसँगै घरको वातावरण र अभिभावकको व्यवहारले समेत महत्वपूर्ण प्रभाव पार्ने बताउनुभयो ।

उहाँले बालबालिकालाई पढ्नका लागि घरमा उपयुक्त वातावरण सिर्जना गर्ने, उनीहरुको नियमित पढाइ तथा गृहकार्यमा चासो दिने, परीक्षाका समयमा मानसिक दबाब नदिई आवश्यक सहयोग गर्ने र बालबालिकाको वास्तविक तयारी बुझेर प्रोत्साहन गर्नुपर्ने विषयमा जानकारी गराउनुभयो ।

प्रिन्सिपल गुरुङले विशेषगरी आमाको भूमिका बालबालिकाको अध्ययन र व्यवहार विकासमा महत्वपूर्ण हुने उल्लेख गर्दै बालबालिकाको परीक्षा अभिभावकका लागि पनि आफ्नो भूमिका र जिम्मेवारीको परीक्षा भएको बताउनुभयो । उहाँले विद्यालय र अभिभावकबीच निरन्तर समन्वय र सहकार्य भएमा बालबालिकाको सिकाइ उपलब्धिमा सुधार ल्याउन सकिने धारणा राख्नुभयो ।

कार्यक्रममा अभिभावकहरुले बालबालिकाको नियमित पढाइ, गृहकार्य, परीक्षाको तयारी, मोबाइल तथा सामाजिक सञ्जालको प्रयोग, घरमा अध्ययन गर्ने वातावरण, विद्यालयको शैक्षिक गतिविधि तथा बालबालिकाको अनुशासन र व्यवहार सुधारका विषयमा जिज्ञासा तथा सुझाव राखेका थिए ।

अभिभावकहरुले विद्यालयले आयोजना गर्ने यस्ता छलफल तथा अन्तरक्रियाले बालबालिकाको अध्ययनप्रति आफूहरुको जिम्मेवारी बुझ्न सहयोग पुग्ने बताएका थिए । साथै विद्यालय र अभिभावकबीच नियमित संवाद तथा समन्वयलाई थप प्रभावकारी बनाउनुपर्नेमा जोड दिएका थिए ।

कार्यक्रमको सहजीकरण विद्यालयका सहायक प्रिन्सिपल सुवोध नेउपानेले गर्नुभएको थियो । उहाँले अभिभावकहरुबाट उठाइएका जिज्ञासा तथा सुझावलाई सम्बोधन गर्दै बालबालिकाको शैक्षिक तथा व्यक्तिगत विकासका लागि विद्यालय र घरबीचको सहकार्य आवश्यक रहेको बताउनुभयो । 

कार्यक्रममा विद्यालयको शैक्षिक वातावरण सुधार, बालबालिकाको नियमित उपस्थिति, अध्ययनमा रुचि बढाउने उपाय तथा अभिभावकले घरमा निर्वाह गर्नुपर्ने भूमिकालगायत विषयमा समेत छलफल भएको विद्यालयले जनाएको छ । 
 

सुन्दरबजारमा अटो पार्किङ व्यवस्थित गर्न १२ स्थानमा १८ ठाउँ निर्धारण

मर्स्याङदी समाचार, १४ असोज लमजुङको सुन्दरबजार नगरपालिकामा सञ्चालन हुने टेम्पो तथा अटोको पार्किङ र यात्रु चढाउने र ओराल्ने स्थान व्यवस्थित गरिएको छ ।

क्यान्सरपीडित राजु धितालको उपचारका लागि ७४ हजार ९ सय ५ रुपैयाँ सहयोग

मर्स्याङदी समाचार, १४ असोज बेसीशहर नगरपालिका–२ मनकामना टोल निवासी क्यान्सरपीडित राजु धितालको उपचारका लागि ७४ हजार ९ सय ५ रुपैयाँ आर्थिक सहयोग

रसुवा बाढीपीडितलाई लमजुङ उद्योग बाणिव्य संघको २२ लाखको राहत

मर्स्याङदी समाचार, १४ असोज लमजुङ उद्योग वाणिज्य संघको पहलमा रसुवाको भोटेकोशी र त्रिशूली क्षेत्रमा बाढीबाट प्रभावित परिवारका लागि करिब २२ लाख