भारी वर्षापछि लमजुङमा भएको क्षतिको प्रजिअ खनालद्वारा स्थलगत अनुगमन

मर्स्याङदी समाचार, १२ असोज
लमजुङमा असोज ९ देखि ११ गतेसम्म परेको भारी वर्षाका कारण विभिन्न स्थानमा भएको क्षतिको प्रमुख जिल्ला खनाल सहितको टोलीले स्थलगत अनुगमन गरेको छ ।

जिल्ला विपद् व्यवस्थापन समितिका अध्यक्षसमेत रहनुभएका प्रमुख जिल्ला अधिकारी कृष्णप्रसाद खनाल नेतृत्वको टोलीले आइतबार बेसीशहर नगरपालिका–१ र दोर्दी गाउँपालिका जोड्ने पुलको उदिपुरतर्फ भासिएको सडक तथा पुल क्षेत्रको निरीक्षण गरेको जिल्ला प्रशासन कार्यालयका खरिदार दिननाथ अधिकारीले जानकारी दिनुभयो ।

वर्षाका कारण पुलको उदिपुरतर्फको केही जमिन भासिएपछि ठूला सवारीसाधनको आवागमन रोकिएको छ । निरीक्षणका क्रममा प्रमुख जिल्ला अधिकारी खनालले पुलको क्षतिग्रस्त तथा जीर्ण भाग तत्काल मर्मत गर्न पूर्वाधार विकास कार्यालयलाई निर्देशन दिनुभएको खरिदार अधिकारीले बताउनु भयो । कार्यालयले सोमबारदेखि नै आवश्यक प्रक्रिया अघि बढाउने जनाएको छ ।

यसैगरी, असोज १० गते लेदोसहितको पहिरोका कारण बेसीशहर नगरपालिका–११ चितीमा क्षति पुगेका घरहरुको समेत स्थलगत निरीक्षण गरिएको छ । पहिरोले प्रकाश सेढाई र विकास सेढाईको घर र रमेश डौलियाको घरमा पु¥याएको क्षतिको विवरण टोलीले संकलन गरेको छ । टोलीले असोज १० गते साँझ परेको भारी वर्षाका कारण मर्स्याङदी गाउँपालिकाको कार्यालयदेखि ङादी जोड्ने सडकमा मर्स्याङदी नदीले पु¥याएको क्षतिको समेत स्थलगत निरीक्षण गरेको छ ।

अनुगमन टोलीमा प्रमुख जिल्ला अधिकारी कृष्णप्रसाद खनाल, बेसीशहर नगरपालिकाका प्रमुख गुमानसिंह अर्याल, उपप्रमुख पदमा गुरुङ, प्रहरी नायव उपरीक्षक जितेन्द्रकुमार बस्नेत, प्रमुख प्रशासकीय अधिकृत माधवप्रसाद ढकाल, बेसीशहर नगरपालिका–११ का वडाध्यक्ष शिव जोशी तथा पूर्वाधार विकास कार्यालयका प्रतिनिधि नरेश जोशीलगायतको उपस्थिती रहेको थियो ।