किसानको मेहनतलाई बजार, दशैंका लागि खुदीमा हाटबजार

मर्स्याङदी समाचार, १६ असोज
उत्तरी लमजुङको मर्स्याङ्दी गाउँपालिकामा दशैंलाई लक्षित गरी कृषि तथा पशु हाटबजार सञ्चालन हुने भएको छ । स्थानीय किसानले उत्पादन गरेका कृषि तथा पशुजन्य उपजलाई बजारीकरण गर्ने तथा उपभोक्तालाई सहज रुपमा स्थानीय उत्पादन उपलब्ध गराउने उद्देश्यले हाटबजार सञ्चालन गर्न लागिएको हो ।

मर्स्याङ्दी गाउँपालिकाको प्रवद्र्धनमा कृषि तथा पशु हाटबजार सञ्चालक समितिको आयोजनामा असोज २७ गतेदेखि २९ गतेसम्म हाटबजार सञ्चालन हुने भएको हो । हाटबजार मर्स्याङ्दी गाउँपालिका–३ खुदी स्थित कृषि तथा पशु सेवा केन्द्र परिसरमा सञ्चालन हुने आयोजकले जनाएको छ ।

हाटबजारमा स्थानीय किसानले उत्पादन गरेका ताजा तरकारी, फलफूल, खसी,बोका, भेडा, कुखुरा लगायत विभिन्न कृषि तथा पशुजन्य उपज बिक्रीका लागि राखिनेछन् । यसबाट दशैंका लागि आवश्यक कृषि तथा पशुजन्य सामग्री स्थानीयस्तरमै सहज रुपमा खरिद गर्न सकिने गाँउपालिका अध्यक्षका स्वकीय प्रदिप गुरुङले जानकारी दिनुभयो ।

हाटबजारमा कृषि उपज बिक्रीका लागि ल्याउने किसानलाई बिक्री मूल्यको ५ प्रतिशत र खसी, बोका, भेडा, कुखुरालगायत पशुपक्षी बिक्री गर्ने किसानलाई बिक्री मूल्यको ३ प्रतिशत प्रोत्साहन रकम गाउँपालिकाले उपलब्ध गराउने व्यवस्था समेत गरिएको गाँउपालिका अध्यक्ष अर्जुन गुरुङले बताउनु भयो । उहाँका अनुसार किसानको उत्पादनलाई उचित मूल्य दिलाउन समर्थन मूल्यको समेत व्यवस्था गरिएको जनाइएको छ ।

हाटबजारले किसान र उपभोक्ताबीच प्रत्यक्ष भेटघाट तथा कारोबारको अवसर सिर्जना गर्नुका साथै स्थानीय उत्पादनको बजार विस्तारमा सहयोग पुग्ने गाँउपालिकाले अपेक्षा गरिएको छ । दशैंको अवसरमा बाह्य बजारबाट आउने वस्तुमा मात्र निर्भर नभई आफ्नै गाउँठाउँमा उत्पादित कृषि तथा पशुजन्य उपजको प्रयोग बढाउन गाउँपालिकाले उपभोक्तालाई आग्रह गरेको छ । स्थानीय उत्पादनको प्रयोग र बजारीकरण बढाउँदा किसानको मेहनतको उचित मूल्य प्राप्त हुनुका साथै स्थानीय अर्थतन्त्रलाई समेत टेवा पुग्ने अपेक्षा गरिएको छ ।