संयुक्त भूपु सैनिक बचत तथा ऋण सहकारीको १३औँ साधारण सभा सम्पन्न

मर्स्याङदी समाचार, १८ असोज
संयुक्त भूपु सैनिक बचत तथा ऋण सहकारी संस्था लिमिटेडको १३औँ वार्षिक साधारण सभा सम्पन्न भएको छ । सभामा संस्थाको आर्थिक वर्ष २०८२÷०८३ को आर्थिक तथा प्रगति विवरण प्रस्तुत गर्दै सहकारीको वित्तीय अवस्था र आगामी योजनाबारे जानकारी गराइएको छ ।

सभामा प्रस्तुत विवरणअनुसार संस्थाको शेयर पुँजी २ करोड ३ लाख ९६ हजार ९ सय रुपैयाँ पुगेको छ । यस्तै, बचत निक्षेप ३८ करोड ४७ लाख १४ हजार ९५ रुपैयाँ रहेको छ, जुन अघिल्लो आर्थिक वर्षको तुलनामा २०.०८ प्रतिशतले प्रगति भएको जनाइएको छ । संस्थाले २९ करोड ३८ लाख ९ हजार ४ सय ७ रुपैयाँ कर्जा लगानी गरेको छ भने जगेडा कोषमा १४ करोड ६१ लाख ५ हजार २ सय ४२ रुपैयाँ ६८ पैसा रहेको छ ।

आर्थिक वर्ष २०८१÷०८२ मा ३६ करोड ३२ लाख ८२ हजार ७८ रुपैयाँ रहेको संस्थाको कुल वासलात आर्थिक वर्ष २०८२÷०८३ मा बढेर ४४ करोड ७ लाख ९२ हजार ९ सय ७९ रुपैयाँ ३ पैसा पुगेको छ । सोही आर्थिक वर्षमा संस्थाले ३८ लाख १८ हजार ५ सय ३३ रुपैयाँ खुद नाफा आर्जन गरेको जनाएको छ ।

संस्थाका अध्यक्ष नेत्रमान गुरुङको अध्यक्षता तथा संस्थाका विशिष्ट सल्लाहकार सुवेदार मेजर खेमजंग गुरुङको प्रमुख आतिथ्यतामा भएको हो । कार्यक्रममा बोल्दै प्रमुख अतिथि गुरुङले सहकारी संस्थाले सदस्यको आर्थिक तथा सामाजिक हितलाई केन्द्रमा राख्दै पारदर्शी, व्यवस्थित र सदस्यकेन्द्रित सेवा प्रवाहमा जोड दिनुपर्ने बताउनुभयो । उहाँले संस्थाको दिगो विकासका लागि सदस्यको विश्वास कायम राख्दै आर्थिक अनुशासन र प्रभावकारी व्यवस्थापनलाई प्राथमिकता दिनुपर्ने धारणा राख्नुभयो ।

कार्यक्रममा शेयर सदस्य तथा मनाङे चौतार आमा समूहकी अध्यक्ष उर्मिला गुरुङ र शेयर सदस्य एवं सञ्चारकर्मी खुसीमाया गुरुङले शुभकामना मन्तव्य राख्दै संस्थाले सदस्यको आवश्यकता र हितअनुसार सेवा विस्तार गर्दै लैजानुपर्ने बताउनुभयो । उहाँहरुले सहकारीको आर्थिक अवस्था थप सुदृढ बनाउन सदस्यको सक्रिय सहभागिता र संस्थाप्रतिको विश्वास महत्वपूर्ण हुने धारणा व्यक्त गर्नुभयो ।

कार्यक्रममा संस्थाको कोषाध्यक्ष सुवे. दुर्गा बहादुर गुरुङले आर्थिक प्रतिवेदन प्रस्तुत गर्नुभएको थियो भने लेखा सुपरीवेक्षण समितिका सदस्य सुवेदार देवबहादुर गुरुङले आर्थिक वर्ष २०८२÷०८३ को वार्षिक प्रतिवेदन प्रस्तुत गर्नुभएको थियो । यस्तै, संस्थाका व्यवस्थापक अनिल गुरुङले प्रस्तावित नीति, कार्यक्रम तथा बजेट प्रस्तुत गर्नुभएको थियो । यस्तै, व्यवस्थापक गुरुङले सहकारीले सदस्यलाई सहुलियत प्रदान गर्ने उद्देश्यले कर्जा लगानीमा ब्याजबाहेक कुनै पनि सेवा शुल्क नलिने निर्णय गरेको बताउनुभयो । उहाँले संस्थाको सेवा थप प्रभावकारी बनाउँदै सदस्यलाई सहज र सरल रुपमा कर्जा तथा अन्य वित्तीय सेवा उपलब्ध गराउनेतर्फ संस्था केन्द्रित रहेको जानकारी दिनुभयो ।

संस्थाका उपाध्यक्ष सुवेदार चित्रबहादुर गुरुङले स्वागत गर्नुभएको कार्यक्रमको सञ्चालन सचिव सुवेदार कृष्ण घलेले गर्नुभएको थियो ।

Community Radio Marsyangdi 95 MHz
Center for Community Development and Communication,Lamjung

ताजा खबर