बेसीशहर–दोर्दी र सुन्दरबजारका २३० परिवारलाई करेसाबारी प्रर्वद्धन तालिम तथा कृषि सामग्री

मर्स्याङदी समाचार, ३१ साउन
लमजुङको बेसीशहर नगरपालिका–११, चिति स्थित जनकल्याण माध्यमिक विद्यालयमा करेसाबारी प्रर्वद्धन सम्बन्धी दुईदिने तालिम सम्पन्न भएको छ । गर्भावस्थादेखि पाँच वर्षमुनिका बालबालिकाको स्वास्थ्य तथा पोषण अवस्थामा सुधार ल्याउने उद्देश्यले तालिम सञ्चालन गरिएको हो ।

वर्ल्ड भिजन इन्टरनेशनल नेपालको आर्थिक सहयोग, ग्रामीण सामुदायिक विकास केन्द्र (आरसिडिसि) नेपालको आयोजना तथा सम्बन्धित पालिकाका कृषि शाखाको सहजीकरणमा बेसीशहर, सुन्दरबजार नगरपालिका र दोर्दी गाउँपालिकाका विभिन्न ११ स्थानमा करेसाबारी प्रवद्र्धनसम्बन्धी तालिम तथा कृषि सामग्री वितरण गरिएको आरसिडिसिका बजार संयोजक दुर्गाप्रसाद ढुङ्गानाले जानकारी दिनुभयो ।

तालिमसँगै सहभागी परिवारलाई पाइप, हजारी, प्लास्टिक, विभिन्न जातका बीउबिजन लगायत आवश्यक कृषि सामग्रीसमेत हस्तान्तरण गरिएको छ । प्रतिपरिवार करिब तीन हजार रुपैयाँ बराबरको कृषि सामग्री वितरण गरिएको ढुङ्गानाले बताउनुभयो ।

तालिममा करेसाबारीको महत्व तथा आवश्यकता, नर्सरी व्यवस्थापन, जैविक विषादीको प्रयोग, रोग तथा किराको व्यवस्थापनलगायतका विषयमा जानकारी गराइएको थियो । सहभागीलाई सैद्धान्तिक ज्ञानसँगै अभ्यास विधिबाट करेसाबारी व्यवस्थापन तथा उत्पादन गर्ने तरिका सिकाइएको थियो ।

बेसीशहर नगरपालिका कृषि शाखाका प्राविधिक सहायकद्वय सञ्जीव बुढामगर र सोवित सुयलले शनिबार र आइतबार जन कल्याण माविमा सञ्चालन भएको तालिममा दुई दिनसम्म करेसाबारी व्यवस्थापन, बीउबिजन उत्पादन तथा संरक्षण, नर्सरी व्यवस्थापन, जैविक विषादी प्रयोग, रोग र किरा नियन्त्रणलगायतका विषयमा प्रशिक्षण दिनुभएको थियो ।

चिति स्थित जनकल्याण माध्यमिक विद्यालयमा आयोजित तालिममा २० जना अभिभावकको सहभागिता रहेको थियो । तालिम तथा कृषि सामग्री वितरण कार्यक्रमअन्तर्गत बेसीशहर र सुन्दरबजार नगरपालिका तथा दोर्दी गाउँपालिकाका गरी कुल २ सय ३० परिवार लाभान्वित भएका छन् ।

घरमै करेसाबारी स्थापना गरी ताजा, स्वच्छ र पोषणयुक्त तरकारी उत्पादन तथा उपभोग गर्ने बानीको विकास गराउँदै गर्भावस्थादेखि पाँच वर्षमुनिका बालबालिकाको पोषण अवस्था सुधार गर्न कार्यक्रमले महत्वपूर्ण योगदान पुग्ने आयोजकले अपेक्षा गरिएको छ ।

Community Radio Marsyangdi 95 MHz
Center for Community Development and Communication,Lamjung

ताजा खबर