सदस्यको स्वास्थ्य सुरक्षामा हातेमालो साकोसको पहल, तीन स्वास्थ्य संस्थासँग सम्झौता

बसन्ता भट्ट, २४ भदौ ।
हातेमालो बचत तथा ऋण सहकारी संस्था लिमिटेडले आफ्ना सदस्य तथा सदस्यका एकाघर परिवारलाई स्वास्थ्य उपचारमा सहुलियत उपलब्ध गराउने उद्देश्यले लमजुङ र चितवनका तीन स्वास्थ्य संस्थासँग सम्झौता गरेको छ ।

सहकारीले बेसीशहर–७ स्थित मोडल सिटी हस्पिटल, प्रयोगशाला सेवाका लागि बेसीशहरस्थित यु.आर. एल. र स्वास्थ्य उपचार सेवाका लागि भरतपुरस्थित नारायणी सामुदायिक हस्पिटलसँग छुट तथा सहुलियत सम्बन्धी सम्झौता गरेको हो । सम्झौताअनुसार हातेमालो साकोसका सदस्य तथा सदस्यका एकाघर परिवारले सम्बन्धित स्वास्थ्य संस्थाबाट विभिन्न स्वास्थ्य सेवा तथा उपचार लिँदा सम्झौतामा तोकिए बमोजिम विशेष छुट पाउने भएका छन् ।

साकोसका मुख्य प्रवन्धक हिरा रावलका अनुसार मोडल सिटी हस्पिटलबाट उपलब्ध हुने विभिन्न स्वास्थ्य सेवा तथा उपचारमा ५ प्रतिशतदेखि २० प्रतिशतसम्म छुट उपलब्ध गराउने व्यवस्था गरिएको छ । यहि भदौ २४ गतेदेखि लागु हुने गरी भएको सम्झौतामा हातेमालो बचत तथा ऋण सहकारी संस्थाका तर्फबाट मुख्य प्रवन्धक हिरा रावल र मोडल सिटी हस्पिटलका प्रवन्ध निर्देशक आदर पौड्यालले हस्ताक्षर गर्नुभएको छ ।

त्यस्तै, प्रयोगशाला सेवातर्फ बेसीशहरमा हुने सेवामा २५ प्रतिशतसम्म र लमजुङबाहिर पठाउनुपर्ने परीक्षणमा १० प्रतिशतसम्म छुट उपलब्ध गराउने गरी यु.आर.एल. बेसीशहरसँग सम्झौता भएको छ । यु.आर.एलका तर्फबाट ल्याव अधिकृत सुसान्त यादवले सम्झौता पत्रमा हस्ताक्षर गर्नुभएको छ ।

यसैगरी, भरतपुरस्थित नारायणी सामुदायिक हस्पिटलबाट स्वास्थ्य उपचार सेवा लिँदा सदस्य तथा उनीहरूका परिवारलाई १५ प्रतिशतसम्म छुट उपलब्ध गराउने गरी सम्झौता भएको रावलले जानकारी दिनुभयो । सम्झौता पत्रमा नारायणी हस्पीटलका प्रशासकिय अधिकृत अरुण लम्सालले हस्ताक्षर गर्नुभएको छ ।

तिन वटै स्वास्थ्य संस्थासँग भएको सम्झौताअनुसार छुट सुविधा लिनका अस्पतालमा उपचारका क्रममा संस्थाको सदस्य परिचयपत्र देखाउनुपर्नेछ । सदस्य परिचयपत्रका आधारमा अस्पतालबाट उपलब्ध हुने विभिन्न स्वास्थ्य सेवा तथा उपचारमा सम्झौतामा उल्लेख भएबमोजिम विशेष छुट प्राप्त गर्न सकिनेछ ।

सहकारी र स्वास्थ्य संस्थाबीच भएको यस किसिमको सहकार्यले सदस्यलाई वित्तीय सेवासँगै स्वास्थ्यसम्बन्धी सुविधा पनि सहुलियत दरमा उपलब्ध गराउन सहयोग पुग्ने अपेक्षा गरिएको छ । विशेषगरी पछिल्लो समय स्वास्थ्य उपचारमा लाग्ने खर्च बढ्दै गइरहेको अवस्थामा सहकारीका सदस्यले सम्झौतामार्फत प्राप्त हुने छुटबाट उपचार खर्च केही हदसम्म कम गर्न सक्ने विश्वास गरिएको छ ।

बेसीशहरमा केन्द्रीय कार्यालय रहेको हातेमालो बचत तथा ऋण सहकारी संस्था लिमिटेडमा हाल ५ हजार ५ सय सदस्य रहेको जनाइएको छ । संस्थाले आफ्ना सदस्यलाई बचत तथा ऋणलगायत विभिन्न वित्तीय सेवा प्रदान गर्दै आएको छ। वित्तीय कारोबारसँगै सहकारीले सामाजिक उत्तरदायित्वअन्तर्गत विभिन्न सेवामूलक तथा सामाजिक गतिविधिसमेत सञ्चालन गर्दै आएको जनाएको छ ।

सदस्यको आर्थिक हितसँगै सामाजिक र स्वास्थ्य सुरक्षामा समेत योगदान पुर्‍याउने उद्देश्यले स्वास्थ्य संस्था तथा अन्य सेवाप्रदायक निकायसँग सहकार्यलाई प्राथमिकता दिइएको साकोसको अध्यक्ष प्रभुराम प्रधानले बताउनुभयो ।

हातेमालो साकोसले स्वास्थ्य संस्थासँग भएको सम्झौताबाट प्राप्त हुने छुट तथा सुविधाको उपयोग गर्न सम्पूर्ण सदस्य तथा सदस्यका एकाघर परिवारलाई साकोसले गरेको छ ।

Community Radio Marsyangdi 95 MHz
Center for Community Development and Communication,Lamjung

ताजा खबर