मर्स्याङ्दी बेँसी जलविद्युत् आयोजनाको आरसीओडी थप

मर्स्याङ्दी समाचार, २० असोज
लमजुङमा निर्माणाधीन ५० मेगावाट क्षमताको मर्स्याङ्दी बेँसी जलविद्युत् आयोजनाको व्यावसायिक विद्युत् उत्पादन सुरु गर्ने मिति अर्थात् आरसीओडी थप गरिएको छ ।

नेपाल विद्युत् प्राधिकरणले पहिलो चरणमा आरसीओडी थप गरेका २७ जलविद्युत् आयोजनामध्ये मर्स्याङ्दी बेँसी आयोजनालाई पनि समावेश गरेको हो । यी आयोजनाको कुल क्षमता ५ सय ४० दशमलव ४७ मेगावाट रहेको छ । तोकिएको समयमा निर्माण सम्पन्न हुन नसकेका आयोजनाको भौतिक प्रगति र प्रवद्र्धकले पूरा गरेको दायित्व मूल्यांकन गरी आरसीओडी थप गरिएको प्राधिकरणले जनाएको छ ।

दिव्यज्योति हाइड्रोपावर लिमिटेडले प्रवद्र्धन गरिरहेको आयोजना मर्स्याङ्दी नदीमा आधारित रन अफ रिभर आयोजना हो । यसको बाँध मस्र्याङ्दी गाउँपालिका–८ र ९ तथा पावरहाउस बेँसीशहर नगरपालिका–१० भोटेफाँटमा निर्माण भइरहेको छ ।

आयोजनाको पुरानो आरसीओडी २०७९ असार ६ गते तोकिएको थियो । तर, विभिन्न कारणले निर्धारित समयमा निर्माण सम्पन्न हुन नसकेपछि प्राधिकरणले पछिल्लो प्रगति र प्रवद्र्धकको दायित्वका आधारमा आरसीओडी थप गरेको हो । करिब ११ अर्ब ३० करोड रुपैयाँ लागत अनुमान गरिएको आयोजनामा पछिल्लो समय निर्माणलाई तीव्रता दिइएको छ । आयोजनाका लागि सिटिजन्स बैंक इन्टरनेसनलको नेतृत्वमा ७ अर्ब ५० करोड रुपैयाँ ऋण लगानीको सम्झौता भएको छ ।

हाल बाँधस्थलको डिसेन्डर, पावरहाउस, सडक तथा जग्गा व्यवस्थापन लगायतका काम अघि बढिरहेका छन् । इलेक्ट्रोमेकानिकल उपकरण आपूर्ति तथा जडानका लागि इटाली र भारतका कम्पनीसँग समेत सम्झौता गरी काम अगाडि बढाइएको आयोजनाले जनाएको छ ।

आयोजना निर्माण सम्पन्न भएर राष्ट्रिय प्रसारण प्रणालीमा जोडिएपछि ५० मेगावाट विद्युत् थपिनुका साथै स्थानीय तहले रोयल्टी प्राप्त गर्ने, रोजगारी सिर्जना हुने र स्थानीय पूर्वाधार विकासमा समेत योगदान पुग्ने अपेक्षा गरिएको छ ।