लोकद दोहोरी प्रतिष्ठानको केन्द्रीय सदस्यमा अधिकारीको उम्मेदवारी

मर्स्याङदी समाचार, २० असोज
लमजुङका कलाकार तथा सञ्चारकर्मी अनुज अधिकारीले राष्ट्रिय लोक तथा दोहोरीगीत प्रतिष्ठान नेपालको केन्द्रीय सदस्य पदमा उम्मेदवारी घोषणा गर्नुभएको छ । महोत्तरीको बर्दिबासमा असोज २२ देखि २४ गतेसम्म आयोजना हुने प्रतिष्ठानको नवौँ राष्ट्रिय महाधिवेशनमा अधिकारीले गण्डकी प्रदेश भूगोलतर्फबाट केन्द्रीय सदस्य पदमा प्रतिस्पर्धा गर्न लागेको हो ।

राष्ट्रिय लोक तथा दोहोरीगीत प्रतिष्ठान लमजुङका निवर्तमान अध्यक्ष एवं संरक्षक अधिकारीले प्रतिष्ठानमा डेढ दशकभन्दा लामो समयदेखि हासिल गरेको सांगठनिक अनुभवलाई अब केन्द्रीय तहमा उपयोग गर्ने उद्देश्यले उम्मेदवारी दिएको बताउनु भयो ।

२०६६ सालमा प्रतिष्ठानको साधारण सदस्यका रुपमा आबद्ध भएका अधिकारीले कार्यसमिति सदस्य, सहसचिव र सचिव हुँदै दुई कार्यकाल जिल्ला अध्यक्षको जिम्मेवारी सम्हालि सक्नुभएको छ । जिल्ला नेतृत्वमा रहँदा उहाँले लमजुङमा प्रतिष्ठानका सांस्कृतिक, सामाजिक तथा सांगठनिक गतिविधिलाई विस्तार र व्यवस्थित गर्न भूमिका खेल्नु भएको थियो ।

सुन्दरबजार नगरपालिका–८ भोटेओडारका स्थायी घर भएका अधिकारी कलाकारिता, सञ्चार तथा सामाजिक क्षेत्रमा समेत क्रियाशील हुनुहुन्छ । दोहोरी प्रतियोगितामार्फत कलाकारितामा प्रवेश गरेका अधिकारी पछिल्लो समय प्रत्यक्ष दोहोरी तथा कार्यक्रम सञ्चालनमा सक्रिय हुनुहुन्छ । लमजुङसहित देशका विभिन्न स्थानमा आयोजना हुने सांस्कृतिक तथा सार्वजनिक कार्यक्रममा उनी कार्यक्रम सञ्चालकका रुपमा सहभागी हुँदै आएका छन् । प्रत्यक्ष दोहोरीमा समेत सक्रिय अधिकारीको दुईवटा दोहोरी गीत बजारमा आइसकेका छन् ।

केन्द्रीय सदस्यमा निर्वाचित भए लोक तथा दोहोरी गीतको संरक्षण र प्रवद्र्धन, कलाकारको हित तथा प्रतिष्ठानका सांगठनिक गतिविधिलाई थप प्रभावकारी बनाउन आफ्नो अनुभव उपयोग गर्ने अधिकारीले बताएका छन् । उहाँले महाधिवेशनमा सहभागी प्रतिनिधिहरूसँग आफ्नो उम्मेदवारीलाई समर्थन गरी काम गर्ने अवसर प्रदान गर्न आग्रह गरेका छन् ।