विपद् प्रतिकार्यका लागि प्रहरीलाई आरसिडिसीको सहयोग

मर्स्याङदी समाचार, २० असोज
विपद् व्यवस्थापन तथा उद्धार कार्यमा सहयोग पु¥याउने उद्देश्यले तीनवटा प्रहरी कार्यालयलाई विपद् व्यवस्थापन सामग्री सहयोग गरिएको छ । लमजुङमा क्रियाशील गैरसरकारी संस्था ग्रामीण सामुदायिक विकास केन्द्र (आरसिडिसि) नेपाल र वल्र्ड भिजन इन्टरनेशनल नेपालको साझेदारीमा सञ्चालित एकीकृत परियोजना अन्तर्गत सशस्त्र प्रहरी बल नेपाल गुल्मा हेडक्वाटर लमजुङ, इलाका प्रहरी कार्यालय भोटेवडार र इलाका प्रहरी कार्यालय मञ्जयाङलाई विपद् व्यवस्थापन सामग्री हस्तान्तरण गरिएको हो ।

प्रहरी कार्यालयहरुलाई विपद्का बेला खोज तथा उद्धार, प्राथमिक व्यवस्थापन तथा जोखिम न्यूनीकरणका लागि आवश्यक विभिन्न सामग्री प्रदान गरिएको आरसिडिसिका बजार संयोजक दुर्गाप्रसाद ढुङ्गानाले जानकारी दिनुभयो । बजार संयोजक ढुङ्गानाका अनुसार प्रत्येक कार्यालयलाई तीनवटा त्रिपाल, ६ जोर गमबुट, ६ सेट पञ्जा, तीनवटा गल, दुईवटा बेल्चा, दुईवटा गैँटी, दुईवटा डोरी, छ वटा हेल्मेट, एउटा फायर एक्स्टिङ्ग्विसर, दुईवटा बाल्टिन, चारवटा लाइफ ज्याकेट र एउटा काठ काट्ने मेसिन प्रदान गरिएको छ ।

प्रति कार्यालय ९८ हजार ८ सय ३० रुपैयाँ बराबरको सामग्री हस्तान्तरण गरिएको हो । तीनवटै कार्यालयलाई गरी कुल २ लाख ९६ हजार ४ सय ९० रुपैयाँ बराबरको विपद् व्यवस्थापन सामग्री सहयोग गरिएको आरसिडिसिले जनाएको छ । विपद्का समयमा स्थानीयस्तरमै उद्धार तथा व्यवस्थापनका लागि आवश्यक सामग्रीको उपलब्धता सहज बनाउने र प्रहरीको विपद् प्रतिकार्य क्षमता अभिवृद्धि गर्ने उद्देश्यले सामग्री सहयोग गरिएको जनाइएको छ ।

बाढी, पहिरो, आगलागी तथा अन्य प्राकृतिक विपद्का समयमा सुरक्षाकर्मीले उद्धार तथा राहतमा प्रत्यक्ष रूपमा खटिनुपर्ने भएकाले यस्ता सामग्रीले तत्काल उद्धार तथा खोज कार्यमा सहयोग पुग्ने अपेक्षा गरिएको छ ।