लमजुङको भुस्मेमा भट्टको व्यावसायिक खेती, उत्पादन घट्यो

खुशी माया गुरुङ, ११ कार्तिक
लमजुङको मर्स्याङदी गाउँपालिका–८ स्थित भुस्मे गाउँमा चिनियाँ र कालो भट्टको व्यावसायिक खेती हुँदै आएको छ । परम्परागत रुपमा बाउबाजेको पालादेखि खेती गरिँदै आएको भट्टा पछिल्लो समय स्थानीयको आम्दानीको स्रोतसमेत बनेको छ ।

स्थानीय किसान होमराज तामाङका अनुसार यस वर्ष गाउँमा करिब १ सय ५० मुरी भट्टा उत्पादन भएको छ । गत वर्ष करिब १ सय ६० मुरी उत्पादन भएको थियो । गत वर्षको तुलनामा यस वर्ष उत्पादनमा कमी आएको उहाँले बताउनु भयो ।
गत वर्ष मौसम अनुकूल हुँदा भट्टको उत्पादन राम्रो भएको थियो । तर, यस वर्ष मौसम प्रतिकूल बनेपछि उत्पादन घटेको स्थानीय किसानको भनाइ छ । उत्पादनमा आएको कमीले भट्ट बिक्रीबाट हुने आम्दानीसमेत घट्ने अनुमान गरिएको छ । गत वर्ष भट्ट बिक्रीबाट करिब २० लाख रुपैयाँ आम्दानी गरेका स्थानीयले यस वर्ष करिब १५ लाख रुपैयाँ आम्दानी हुने अपेक्षा गरेका छन् ।

भुस्मे गाउँका करिब ३० घरधुरी प्रत्यक्ष रुपमा भट्टा खेतीमा संलग्न छन् । स्थानीय किसानले करिब ८० देखि १ सय रोपनी क्षेत्रफलमा भट्ट खेती गर्दै आएका छन् ।

गाउँमा उत्पादन हुने चिनियाँ र कालो भट्ट बेसीसहर, खुदी, सुन्दरबजारलगायतका स्थानीय बजारमा बिक्री हुँदै आएको छ । साथै, स्थानीयले आफ्ना आफन्त तथा परिवारजनलाई कोसेलीका रुपमा विदेशमा समेत भट्टा पठाउने गरेका छन् ।

परम्परागत खेतीलाई व्यावसायिक रुपमा विस्तार गर्दै आएका किसानका लागि भट्ट खेती जीविकोपार्जन र आम्दानीको महत्त्वपूर्ण आधार बनेको छ । स्थानीयस्तरमै बजार पाउँदै आएको भट्ट खेतीलाई व्यवस्थित गर्न सके किसानको आम्दानी बढाउन सकिने सम्भावना देखिन्छ ।