राति ७ बजेपछि लमजुङ हुँदै मनाङ जाने सवारी चलाउन नपाइने

मर्स्याङदी समाचार, १२ कार्तिक
सम्भावित भारी वर्षा र त्यसबाट बाढीपहिरो लगायतका विपद् निम्तिन सक्ने जोखिमलाई मध्यनजर गर्दै लमजुङमा रातिको समयमा सवारीसाधन आवागमनमा रोक लगाइएको छ । जिल्ला प्रशासन कार्यालय लमजुङले कात्तिक १२ गतेदेखि १५ गतेसम्म राति ७ बजेदेखि बिहान ५ बजेसम्म सवारीसाधन सञ्चालनमा रोक लगाउने निर्णय गरेको हो ।

नेपाल मौसम विज्ञान विभागको मौसम पूर्वानुमान महाशाखाबाट प्राप्त सूचनाअनुसार बंगालको खाडीमा विकसित ‘अर्णव’ नामक चक्रवातका कारण कात्तिक १२, १३ र १४ गते देशका केही भूभागमा मेघगर्जन र चट्याङसहित भारी वर्षा हुने सम्भावना रहेकाले सम्भावित वर्षाका कारण बाढीपहिरो लगायतका विपद् निम्तिन सक्ने जोखिम रहेकाले सतर्कता अपनाइएको जिल्ला प्रशासन कार्यालयले जनाएको छ ।

प्रशासनले जारी गरेको सूचना अनुसार कात्तिक १२ गतेदेखि १५ गतेसम्म लमजुङ हुँदै मनाङको सिमानासम्म जाने सवारीसाधनलाई राति ७ बजेदेखि बिहान ६ बजेसम्म सञ्चालनमा रोक लगाइएको छ । यस निर्णयबाट सम्भावित विपद्का कारण हुन सक्ने मानवीय तथा भौतिक क्षति न्यूनीकरण गर्ने अपेक्षा गरिएको छ ।

यसैबीच, जिल्ला प्रशासन कार्यालयले विपद्को जोखिम रहेको अवधिमा अत्यावश्यक कामबाहेक यात्रा नगर्न र सुरक्षित स्थानमा रहन सर्वसाधारणलाई आग्रह गरेको छ । सम्भावित जोखिमलाई ध्यानमा राख्दै प्रशासनले जारी गरेको सूचनाको पालना गर्नसमेत अनुरोध गरिएको छ ।

जिल्ला प्रशासन कार्यालय लमजुङका सहायक प्रमुख जिल्ला अधिकारी दीपक पौडेलले सूचना जारी गर्दै विपद्को जोखिमबाट सुरक्षित रहन र सवारी आवागमन सम्बन्धी निर्णय पालना गर्न आमनागरिकलाई आग्रह गर्नुभएको छ ।