बेसीशहरमा सञ्चालित एकमहिने निशुल्क ड्राइभिङ तालिमको समापन

मर्स्याङदी समाचार, १२ असोज
एकिकृत सेवा कार्यालय लमजुङले आयोजना गरेको एक महिने निशुल्क हलुका सवारी चालक प्रशिक्षण तालिम बुधबार समापन गरिएको छ । युवाहरुलाई सिप सिकाएर रोजगारीमा जोड्ने लक्ष्य सहित कार्यालयले चालु आर्थिक वर्षको वार्षिक स्वीकृत कार्यक्रम अन्तर्गत तालिम आयोजना गरेको हो ।

तालिममा ९ जना पुरुष र ६ जना महिला गरी १५ जना सहभागी थिए । तालिमको समापन तथा प्रमाणपत्र वितरण कार्यक्रमका प्रमुख अतिथि जिल्ला समन्वय समिति लमजुङका प्रमुख पूर्णवहादुर गुरुङले आफूले सिकेको सिपलाई व्यवहारमा उतार्दै आत्मनिर्भर बन्नुपर्नेमा जोड दिनुभयो । सवारी चालक सिप जिम्मेवारी, धैर्य, अनुशासन र मानविय समवेदनका सँगै जोडिएको भन्दै उहाँले ट्राफिक नियम पालन सँगै सडक सुरक्षा लाई विशेष ध्यान दिनुपर्ने बताउनुभयो ।

एकिकृत सेवा कार्यलय लमजुङका प्रमुख ठाकुर प्रसाद ढकालले सिपयुक्त दक्ष जनशक्ति उत्पादनसँगै स्वरोजगारको सृजना गर्ने उदेश्यले तालिमको आयोजना गरिएको वताउनुभयो । शिक्षा र सिप कहिल्ले नरोकिने हुदाँ आफूमा भएको ज्ञान र सिपको उपयोग गर्दै आयआर्जनमा जोडिन सहभागिहरुलाई आग्रह गर्नुभयो । तालिमका सहभागी सरोज जोशी तालिमले आफूलाई आत्मविश्वास जगाउनुका साथै रोजगारीमा जोडिने अवसर सृजना गर्ने विश्वास व्यक्त गर्नुभयो । आफूजस्तै सिप सिक्न चाहनेलाई थप तालिमहरु सञ्चालन गर्न समेत उहाँको आग्रह थियो । तालिम बेँसीसहर नगरपालिका–८ स्थित लमजुङ कालिका ड्राइभिङ एन्ड ट्रेनिङ सेन्टरमा सञ्चालन भएको हो ।

‘सीप सिकौँ, आत्मनिर्भर बनौँ’ भन्ने मुल नारा सहित कार्यालयले विभिन्न सिपमूलक तालिम सञ्चालन गर्दै आएको छ । यसवर्ष हलुका सवारी चालक तालिम र आधारभूत कम्प्यूटर तालिम सञ्चालन गरिएको कार्यालय प्रमुख ढकालले जानाकारी दिनुभयो । समापन कार्यक्रमको सहजिकरण एकिकृत सेवा कार्यलयका भानुभक्त थापामगरले गर्नुभएको थियो ।