मोडल सिटी हस्पिटलको निःशुल्क मानसिक स्वास्थ्य शिविरबाट ५० जना लाभान्वित

मर्स्याङदी समाचार, २५ असोज
लमजुङको बेसीशहर नगरपालिका–७ स्थित मोडल सिटी हस्पिटल प्रा.लि.ले विश्व मानसिक स्वास्थ्य दिवसको अवसरमा आयोजना गरेको निःशुल्क मानसिक स्वास्थ्य शिविरबाट ५० जना लाभान्वित भएका छन् ।

मानसिक स्वास्थ्यसम्बन्धी समस्याको पहिचान, उपचार, परामर्श तथा जनचेतना अभिवृद्धि गर्ने उद्देश्यले आयोजित शिविरमा ३० जनाले निःशुल्क स्वास्थ्य सेवा प्राप्त गरेका छन् । मानसिक स्वास्थ्यसम्बन्धी समस्या भएका तथा नियमित रुपमा मानसिक रोगको औषधि सेवन गरिरहेका उनीहरुलाई स्वास्थ्य परीक्षण, प्रयोगशालासम्बन्धी सेवा तथा औषधि निःशुल्क उपलब्ध गराइएको अस्पतालले जनाएको छ ।

त्यस्तै, अन्य २० जनालाई मानसिक स्वास्थ्यसम्बन्धी परामर्श, आवश्यक जानकारी तथा जनचेतनामूलक सेवा प्रदान गरिएको थियो । शिविरमा प्राज्ञ डा. सन्देश काफ्लेसहितको टोलीले सेवा प्रदान गरेको थियो । शिविरमार्फत मानसिक स्वास्थ्यसम्बन्धी समस्यालाई लुकाएर राख्नुभन्दा समयमै पहिचान गरी उचित उपचार तथा परामर्श लिनुपर्ने सन्देश प्रवाह गरिएको अस्पतालले जनाएको छ । साथै, मानसिक रोगप्रति समाजमा विद्यमान भ्रम, संकोच र नकारात्मक धारणालाई न्यूनीकरण गर्न पनि कार्यक्रमले सहयोग पुग्ने विश्वास अस्पतालले लिएको छ ।

सामाजिक उत्तरदायित्वअन्तर्गत नागरिकलाई सहज र गुणस्तरीय स्वास्थ्य सेवा उपलब्ध गराउने उद्देश्यले आगामी दिनमा पनि यस्ता सेवामूलक कार्यक्रमलाई निरन्तरता दिने अस्पतालले प्रतिबद्धता जनाएको छ । विश्व मानसिक स्वास्थ्य दिवसका अवसरमा आयोजित शिविरले मानसिक स्वास्थ्यप्रतिको जनचेतना अभिवृद्धि गर्नुका साथै मानसिक स्वास्थ्य सेवाको पहुँच विस्तारमा सहयोग पुग्ने अपेक्षा गरिएको छ ।