हातेमालो साकोसको उपहार योजनामा ३ जनाले पाए खसी, ८ जनालाई इन्डक्सन चुलो

मर्स्याङदी समाचार, २५ असोज
हातेमालो बचत तथा ऋण सहकारी संस्था लिमिटेडको १६औँ वार्षिक साधारण सभा अन्तर्गत सञ्चालित उपहार योजनामा तीन जना सदस्यले खसी र आठ जनाले इन्डक्सन चुलो उपहार प्राप्त गरेका छन् ।

सहकारीले मुख्य कार्यालयसहित खुदी र भोटेवडार सेवा केन्द्रमा एकाइगत रुपमा साधारण सभा सम्पन्न गर्दै सदस्यका लागि गोलाप्रथाबाट विभिन्न उपहार वितरण गरेको हो । योजना अन्तर्गत मुख्य कार्यालयमा ३५ जना तथा खुदी र भोटेवडार सेवा केन्द्रमा २५÷२५ जना सदस्यले विभिन्न उपहार प्राप्त गरेका छन् ।

मुख्य कार्यालयमा आयोजित कार्यक्रममा बेसीशहर नगरपालिका–९, बिम्दाबेँसीकी अर्पणा गुरुङले करिब ३३ किलोको खसी प्राप्त गर्नुभएको थियो । त्यसैगरी, खुदी सेवा केन्द्रमा आयोजित कार्यक्रममा मर्स्याङदी गाउँपालिका–८, बान्द्रेकी हिरादेवी घले र भोटेवडार सेवा केन्द्रमा दोर्दी गाउँपालिका–६, हरिगाउँकी मैता गुरुङले खसी उपहार प्राप्त गर्नुभएको हो ।

खुदी सेवा केन्द्रमा दुई जनाले इन्डक्सन चुलो र अन्य २२ जनाले विभिन्न उपहार प्राप्त गरेका छन् । भोटेवडार सेवा केन्द्रमा धनबहादुर गुरुङ र सुसीना तामाङले इन्डक्सन चुलो उपहार पाउनुभएको छ । अन्य सदस्यले पनि चिनी, चियापत्ती, साबुन, सर्फ तथा चकलेटलगायतका उपहार प्राप्त गरेका छन् ।

खुदीमा उपहार विजेतालाई सहकारीका अध्यक्ष प्रभुराम प्रधान र संस्थापक सेयर सदस्यसमेत रहनुभएका मर्स्याङदी गाउँपालिका अध्यक्ष अर्जुन गुरुङले उपहार हस्तान्तरण गर्नुभएको थियो । भोटेवडारमा संस्थाका उपाध्यक्ष राजेन्द्र बोहोरा, सचिव गोपाल परियार र निर्वाचन उपसमिति सदस्य रेशमलाल श्रेष्ठलगायतले उपहार वितरण गर्नुभएको थियो ।

सहकारीका मुख्य प्रबन्धक हिराबहादुर रावलका अनुसार साधारणसभामा समयमै उपस्थित भई कार्यक्रमको अन्तिमसम्म बस्ने सदस्यलाई प्रदान गरिएको कुपनका आधारमा गोलाप्रथा गरी उपहार छनोट गरिएको हो । सदस्यको सक्रिय सहभागिता बढाउनुका साथै संस्थाप्रति अपनत्व अभिवृद्धि गर्ने उद्देश्यले उपहार कार्यक्रम सञ्चालन गरिएको उहाँले बताउनुभयो । उपहार कार्यक्रममा सदस्यहरुको उत्साहजनक सहभागिता रहेको सहकारीले जनाएको छ ।