बाढी प्रभावित चामे र हुम्डेका ३६ परिवारलाई राहत वितरण

मर्स्याङदी समाचार, २ कार्तिक
असोज ९ र १० गते मनाङमा आएको बाढीबाट प्रभावित परिवारलाई राहत वितरण गरिएको छ । बाढीपछि राहत वितरणका कार्यक्रम प्रायः सदरमुकाम चामेमा केन्द्रित भइरहेका बेला यसपटक राहतको पहुँचबाट टाढा रहेको हुम्डेका प्रभावित परिवारले पनि राहत सामग्री प्राप्त गरेका छन् ।

सन्ना गुरुङ र साथीहरुको पहल तथा सहयोगमा मनाङको चामे र हुम्डेका ३६ परिवारलाई राहत सामग्री वितरण गरिएको हो । अभियानअन्तर्गत चामेका २३ परिवारलाई डसना, कम्बल, सिरानी, तन्ना, लत्ताकपडा, स्यानिटरी प्याड तथा शिशुका लागि डाइपर लगायतका अत्यावश्यक सामग्री प्रदान गरिएको छ ।

त्यसैगरी, हुम्डेका १३ घरपरिवारलाई डसना, कम्बल, लत्ताकपडा, चामल, भान्सामा प्रयोग हुने भाँडाकुँडा, शिशुका लागि डाइपर तथा बालबालिकाका लागि शैक्षिक सामग्री (स्टेसनरी) वितरण गरिएको छ । राहत वितरण कार्यक्रममा चामे गाउँपालिका अध्यक्ष लोकेन्द्र घले, वडा नम्बर ५ का अध्यक्ष विजय गुरुङ तथा चामे गाउँपालिकाका स्वास्थ्य प्रमुख छोदेन लामाको उपस्थिति रहेको थियो ।

विपद्का कारण दैनिक जीवनयापनमा कठिनाइ भोगिरहेका परिवारलाई लक्षित गरी गरिएको यस सहयोगले उनीहरुको दैनिकी सहज बनाउन केही राहत पुग्ने अपेक्षा गरिएको छ । विशेषगरी, यसअघि राहत वितरणको पहुँचमा पुग्न कठिनाइ भएको हुम्डेका प्रभावित परिवारसम्म राहत सामग्री पु¥याउनुले विपद्का बेला दुर्गम क्षेत्रका नागरिकलाई समेत सहयोग आवश्यक रहेको सन्देश दिएको छ ।