जिल्ला स्तरीय एकल गायन प्रतियोगितामा मध्यनेपालका रुपेश वि.क प्रथम

मर्स्याङदी समाचार, १७ कार्तिक
लमजुङको बेसीशहरमा मंगलबार अयोजित जिल्लास्तरीय एकल गायन प्रतियोगितामा मध्यनेपालका रुपेश वि.क प्रथम भएका छन् ।

क्व्होलासोथार बाहेक जिल्लाका ७ स्थानिय तहका १२ जना विद्यार्थीहरुको सहभागिता रहेको प्रतियोगितामा मध्यनेपाल स्थित कुसुमाकर माध्यमिक विद्यालय कक्षा १० मा अध्ययनरत विकले प्रथम स्थान हासिल गरेका हुन् । विकले पुरस्कार स्वरुप नगद ६ हजार र प्रमाणपत्र पाएका छन् ।

यसैगरी प्रतियोगितामा बेसीशहरस्थित जनविकास माध्यमिक विद्यालय कक्षा ९ मा अध्यनरत प्रिती थापा द्धितिय र सुन्दरबजार स्थित भक्ति नमुना माध्यमिक विद्यालय कक्षा ९ मा अध्यनरत रविना भुजेल तृतीय भएकी छन् भने मध्यनेपालको गणेश मालिका मावि कक्षा १० मा अध्यनरत कुशल दुराले सान्त्वना स्थान हासिल गरेका छन् ।

प्रतियोगितामा द्धितियलाई ४ हजार, तृतियलाई ३ हजार र सान्त्वनालाई २ हजार रुपैया र प्रमाणपत्र पुरस्कार प्रदान गरिएको छ ।

एकिकृत सेवा कार्यालयले विद्यार्थी प्रतिभा पहिचान कार्यक्रम अन्र्तगत आयोजना गरेको प्रतियोगिताको उद्घाटन प्रमुख जिल्ला अधिकारी कृष्णप्रसाद खनालले गर्नुभएको हो ।

विजेताका विद्यार्थीलाई एकिकृत सेवा कार्यालयका प्रमुख ठाकुरप्रसाद ढकालले पुरस्कार वितरण गर्नुभएको थियो । अल्पकालिन आश्रय केन्द्र प्रमुख सिर्जना पौडेलले सञ्चालन गर्नुभएको कार्यक्रममा एकिकृत सेवा कार्यालयका प्राविधिक सहायक भानुभक्त मगरले स्वागत मन्तव्य राख्नुभएको थियो ।

निर्णायकमा लोकदोहरी प्रतिष्ठान लमजुङ शाखा अध्यक्ष तथा गायक प्रशान्त तामाङ सहित तिनजनाको टोली रहेको थियो ।