मसिरको दोश्रो साता दोश्रो भोटेओडार कप फुटवल प्रतियोगिता हुने

मर्स्याङदी समाचार, १५ कार्तिक
लमजुङको सुन्दरवजार नगरपालिका–९, भोटेओडारमा दोश्रो भोटेओडार कप सेभेन ए साईड फुटवल प्रतियोगिता हुने भएको छ । स्थानिय बुद्ध युवाक्लवले आगामी मसिरको १८ गतेदेखि दोश्रो भोटेओडार कप खुल्ला फुटवल प्रतियोगिता गर्ने भएको हो ।

क्लवले आईतबार पत्रकार सम्मेलन गरी प्रतियोगिताको बारेमा जानकारी गराएको हो । खेलको माध्यामबाट स्थानिय खेलाडीलाई प्रोत्साहन गर्न विभिन्न समुदायमा रहेका युवाहरुमा आपसी सद्भाव बढाउन फुटवल प्रतियोगिता आयोजना गरीएको क्लवका अध्यक्ष योगबहादुर गुरुङ कालुले बताउनुभयो ।

भोटेओडारस्थित डिडिसी मैदानमा हुने सो प्रतियोगितामा लमजुङ सहित गोरखा, तनहुँ र कास्कीबाट समेत खेलाडीको सहभागिता हुने आयोजकले जनाएको छ । प्रतियोगितामा विजेताले नगद तीनलाख रुपैयासहित ट्रफी, मेडल र प्रमाण पत्र पाउनेछन् भने उपविजेताले नगद एकलाख ५० हजार रुपैयाको साथमा मेडल र प्रमाण पत्र पाउनेछन् । सो बाहेक सेमी फाईनल पुग्ने दुई टिमलाई प्रतिटिम २५ हजार रुपैया उपलब्ध गराईने पनि आयोजकले जनाएको छ ।

प्रतियोगितामा उत्कृष्ट खेलाडी नगद १५ हजार, उत्कृष्ट गोल रक्षक र सर्वाधिक गोलकर्तालाई पनि जनहि नगद १० हजार पुरस्कारको साथमा मेडल र प्रमाण पत्र रहेको क्लवले जनाएको छ । प्रतियोगितामा प्रत्येक खेलमा म्यान अफ दि म्याच समेत घोषणा गरीने क्लवले जनाएको छ ।

सेभेन ए साईड फुटवल प्रतियोगिता भएकोले खेलमा सातजना खेलाडी र थप पाँच जना हुनेछन् । क्लवले दर्ता शुल्क १० हजार कायम गरेको छ भने बाहिरी जिल्लाबाट भौगोलिक रुपमा टाडाबाट आउने टिमलाई दर्ता शुल्क नलिने पनि जनाएको छ ।

क्लवले प्रतियोगितालाई सभ्यरुपमा सम्पन्न गर्न स्वदेश तथा विदेशबाट सहयोग संकलन अभियान शुरु गरेको छ भने आन्तरिक तयारी समेत शुरु गरीसकेको जनाएको छ । आथिक व्यवस्थापनकै लागि क्लवले गत वर्षनै विभिन्न देशमा रहेका पूर्व खेलाडी र क्लव शुभेच्छुकहरुलाई समेटी इन्टरनेशनल बुद्ध युथ क्लव समेत गठन गरेको थियो । विभिन्न समयमा फुटवल प्रतियोगिता आयोजना गरेको क्लवले गत वर्षदेखि प्रतियोगितालाई थप व्यवस्थीत बनाउदै आएको छ । जिल्लाकै नमुना र आकर्षक प्रतियोगिताको रुपमा पहिचान बनाउने क्लवको लक्ष्य रहेको छ ।

क्लवका अध्यक्ष योगबहादुर गुरुङको अध्यक्षतामा भएको पत्रकार सम्मेलनमा क्लवका पूर्व अध्यक्ष जिवन गुरुङ लगायत क्लवका पदाधिकारी, सदस्य एवं जिल्लाका सञ्चारकर्मीहरुको सहभागिता रहेको थियो । पत्रकार भेटघाटकै अवसर पारी क्लवले बडा दशै, तिहार, छठ, नेपाल संवत लगायतको शुभकामना आदनप्रदान कार्यक्रम पनि आयोजना गरेको थियो । कार्यक्रममा विभिन्न स्थानिय तह जनप्रतिनिधी, राजनितिक दलका प्रतिनिधी, शुभेच्छुक लगायतको सहभागिता रहेको थियो ।

Community Radio Marsyangdi 95 MHz
Center for Community Development and Communication,Lamjung

ताजा खबर